YANGI O'ZBEKISTONDA SAYLOV QONUNCHILIGI TAKOMILLASHUVI

Demokratik jamiyat qurishning talablaridan biri – ko‘ppartiyaviylik asosida demokratik saylovlar o‘tkazishdir. Ko‘ppartiyaviylik bo`lgandagina har bir fuqaro tom ma’nodagi tanlash huquqiga ega bo‘ladi.

Ma’lumki, mamlakatimiz mustaqilligining o‘tgan davrida ko‘ppartiyaviylikni tashkil etish va yanada rivojlantirish uchun keng imkoniyatlar yaratildi. Xususan, mustaqil davlat taraqqiyotining birinchi bosqichi siyosiy partiyalar uchun shakllanish davri bo‘lgan bo‘lsa, ikkinchi bosqich ular uchun har tomonlama rivojlanish davri bo‘ldi, deya  bemalol aytishimiz mumkin. Har ikkala bosqichda ham siyosiy partiyalar saylovlar jarayonida ishtirok etib, saylovdan saylovgacha bo‘lgan davrda o‘z tajribalarini orttirdilar, aholi bilan yaqindan muloqotga kirishib, tarafdorlari, jumladan, a’zolari sonini yanada ko‘paytirishga erishdilar. Bu jarayonda, shubhasiz, siyosiy partiyalarning zamonaviy saylov texnologiyalarini qo‘llash tajribasi ham ortib bormoqda.